CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: 2 Korinito 1: 16-20

Matua: 2 Korinito 1: 17-18

“O lenei, pe ai ea sa’u manatu faaletonu ina ua faapea ona ou filifili? Pe ou te filifili ea i la le tino i mea ou te filifili ai, ina ia ia te a’u le ioe, ioe, ma le leai, leai? Ae faamaoni le         Atua, sa le Ioe ma Leai la matou upu ia te outou”.

Manatu Autu: Tumau i folafolaga (Keeping promises)

Upu e masani ai. “E asa le faiva ae le ‘asa le masalo; e poto le tautai ae sese lana ‘atu i ama”. E faapena le tagata, po o a folafolaga e fai ae e iai lava mea e tutupu e le taunuu ai folafolaga sa fai mai lea aso i lea aso. Pei ā o upu a le atunuu, “O le aso ma le filiga o le aso ma le mata’igā tila” (Each day brings its own views of what is on the horizon, each day brings its own choices). E faapena le valaauina o Paulo e Keriso e fai ma vaa ma ipu o lana Talalelei i nuuese. E taitai ma faasino e le Agaga Paia le galuega talai a le Aposetolo mai lea aso i lea aso.

I ff12-14 o le mataupu 1 – o loo tusi ai Paulo ia Korinito, i lo latou mitamita i vaega ia o lo latou ola valaauina e le Keriso e talai le talalelei a Keriso ia i latou:

·       Ua latou mitamita i le mau a lo latou loto fuatiaifo

·       Ua latou mitamita i le paia ma le faamaoni faaleatua sa latou amio ai i totonu o lenei lalolagi, aemaise o le feagai ai ma latou (Korinito), e le o so latou poto faalelalolagi, a’o le alofa tunoa o le Atua

·       Ua latou mitamita ona e leai se mea na latou tusia e le mafai ona latou faitau ma malamalama iai, ua mafai ai ona latou mitamita ona o Paulo ma lana au talai, ia faapea foi i latou ona latou mitamita ona oi latou i le Aso o le Alii o Iesu (toe afio faalua mai o Keriso).

O le mautinoa o Paulo i mea ua ia ta’ua ua latou tau mitamita faatasi ai ma Korinito  – sa ia manatu ai ia na mua’i alu atu ia Korinito, ina latou maua faalua se alofa (f15); faailoa foi e Paulo le ala e alu atu ai i Korinito, o le tasi lea o aai o Eleni o Maketonia. Peitai – ua le o gatasi le futia ma le umele i le manatu o Paulo ia muai alu i Korinito ma le taitaiga tonu a le Agaga i le galuega talai a le aposetolo. Ona o Maketonia e ui atu ai ma toe foi mai Paulo pe a alu i Korinito, ua valoia ai le molia o Paulo ei latou i Iutaia o tagata ia sa fai ma faalavelave i le talaiga e Paulo o le Talalelei i nuuese.

E le i alo Paulo i le ata o le laau, ae ua ia faailoa ia Korinito le taua i le kerisiano o le faamaoni i folafolaga e fai i le faataitaiga lea – “a leai ia tumau ai i le leai; a ioe foi ia tumau ai foi i le ioe”. Sa faapea ona latou faamaoni aua sa le Ioe ma Leai sa latou upu ia tei latou. Sa faapena foi Keriso sa le ioe ma leai ia, ‘a ua ia te ia na o le Ioe lava, aua o ia o le Ioe i mea uma ua folafolaina e le Atua, o le mea lea ua avea ai o ia ma a tatou Amene – e oo ai i le viiga o le Atua.

E lei alo Iesu i le ata o le laau – ina ua faamasinoina o ia e ona tagata ma le lalolagi. Sa tali Ioe – i mea uma ua folafolaina ia te ia, lea na ia gugu ai i molimau pepelo a ona tagata ma tauave ma le onosai i le satauro mea tiga uma na faia e le lagolagi agasala ia te ia.

A tatou faamaoni ia tatou upu ma faaiuga fai ma folafolaga – e talitonuina foi la ta upu e taulogologo atu faapea foi o tatou tulaga ma tofiga ua valaauina ai i tatou e le Atua.

Tumau pea i le Atua le viiga e faavavau – ona o Iesu Amene

Anzac Tuala (FS) 

.………………………………………